A “Porta da Horta do Concello” ou “Portal do Campo” era unha das 13 portas da cidade e estaba situada aproximadamente ao inicio da actual Avenida de Pontevedra, e daba acceso ao interior da cidade.
De 1455 hai referencia a unha primeira porta feita en madeira, que chegou moi deteriorada ata principios do século XVII, polo que en 1657 ordeouse a construción doutra, en cantería de pedra , para a mesma ubicación. O arquitecto foi Domingo García, o escultor canteiro foi Roque de Neira, e os traballos pictóricos foron obra de Manuel Feijóo. A construcción durou un total de 6 meses.
Esta porta, e a Porta da Aira, foron construídas na mesma época. Ambas deberon chamar a atención pola súa perfección arquitectónica e a labra da súa cantería, así, o poeta Bravo de Velasco adicoulle un soneto descriptivo alabando a súa beleza en 1657.
A partir de 1837 procedeuse a eliminación física das derradeiras portas da cidade que ainda se tiñan en pé, básicamente aludindo a razóns de índole sanitaria.
Non existen representacións gráficas ou planos detallados desta porta, máis no “Diccionario Geográfico de España: Orense y Pontevedra”, obra de Tomás López (1730-1802), aparece un debuxo moi esquemático das portas e edificios singulares de Ourense, bastante recoñecibles, e que serviu de base pra realizar unha proposta de restitución visual en 3D baseándonos nas proporcións, nos elementos constructivos que se distinguen, na información descriptiva histórica dispoñible, na arquitectura comparada, e nas recomendacións históricas de expertos medievalistas.
Fontes : (Diccionario geográfico de España : Orense y Pontevedra”- Tomás López – B.N.E; Olga Gallego Domínguez 2001- Ramón Otero Pedrayo 1952; J. Hervella Vázquez, “La Puerta de la Huerta del Concejo”)